《極主夫道》快撚啲拍日劇啦！

津田健次郎請受我一拜！

今日日本網上最熱漫畫相關話題，一定係《極主夫道》真人版廣告！

為咗賀吓《極主夫道》漫畫版出到第4期，銷量超過120萬本，喺年尾無啦啦有條咁癲嘅宣傳片出現，明明12月頭官方先至出咗一條第4期嘅漫畫版宣傳片，點知仲會有條癲到神級一樣嘅真人版宣傳片。我直情係High到唔知應該點樣整理文路。

津田健次郎簡直係由漫畫行出嚟嘅一樣，堅到爆！


真人版宣傳片上傳只係1日，已經超過220萬個View。


一年前漫畫版宣傳片，累積係32萬個View，真係幫到手谷銷量。

［勝手LINK］
>《くらげバンチ》連載網站[免費閱讀]
>官方精品通販網站
>去Amazon.co.jp買書

《極主夫道》呢本漫畫係2018年嘅奇蹟，喺新潮社嘅網上平台《くらげバンチ》連載，平地一聲雷，憑住高反差兼易食到爆嘅情節爆紅，仲喺2018年掃晒年尾啲漫畫獎項。漫畫版人氣高企又好賣，為新潮社吐氣揚眉，網上漫畫平台捱咗咁多年都冇咩起色，今次出版社終於有漫畫係有錢賺。



《極主夫道》講咩？

故仔好簡單，人稱「不死身之龍」嘅黑社會大佬阿龍為真愛金盤洗手，留喺屋企做全職主夫，為女強人老婆美久日日煮飯洗衫打掃，同埋喺屋企撚吓貓。不過話晒係黑幫傳說，龍哥退隱江湖之後，都江湖味十足，一舉手一投足都散發住霸氣，搞到連煮飯洗衫同買餸都霸氣外露，成日俾白警逗、嚇親小朋友同街坊。

呢套作品最黐線又最好睇嘅地方，係睇住阿龍用好認真好黑社會嘅語氣同表情，真心做啲日常過日常嘅嘢。龍哥仲要女子力超強，勁過好多師奶仔。我相信睇住呢本漫畫，學嘅嘢多過「婦女新姿」同「都市閒情」（雖然兩個節目都唔存在）。

社團解散之後，佢以前啲同兄弟都轉晒行賣忌廉薄餅，連黑道大家姐都去咗超級市場做，但係唔知點解又係個個都一身江湖味。

 呢集笑到反肚。大家姐啲日文真係江湖味濃到爆，用嘅字眼語帶雙關，可惜一譯做中文，就冇咗日文嘅玩味。個人覺得勉強似番原文霸氣意思嘅，都係用台語或者廣東話呢啲有咁多歷練嘅語言。（我流廣東話。台版中文版唔係咁嘅。）［click圖放大］

好睇在邊？

作者 おおのこうすけ一出道第一個連載就係《極主夫道》，畫功好之餘，掌握反差嘅Sense、每一話故事節奏都好正，幾乎每一話都會有估你唔倒嘅爆笑位，睇咗4期都唔厭，係近年出一期我會忍唔住敗家一期嘅好作品。

睇漫畫俾錢睇是常識，漫畫家都要食飯嘅。

呢套作品有個好勁嘅地方，就係即使你唔明日文，睇畫面大約都會由角色嘅表情、肢體語言、發生地點同環境等等，大致上明白佢哋搞緊咩。唔明日文都可以笑餐飽。
（真係俾過唔識日文嘅 Mokona Lam 睇，堅係笑得好開心）

目前有台灣中文版，但我個人覺得台版可以真癲啲，用台語譯會仲襯。
香港如果有人出版嘅話，用廣東話譯對白先至爽皮。
既然冇人出港版，又俾我手痕玩吓。
（又係嗰句，我手痕咋，大家去買正版！）

   
求其搵幾頁都見識倒情況有幾高反差，龍哥嘅反差萌完全係大佬級。佢條圍裙堅係有得賣。（我流廣東話。台版中文版唔係咁嘅。）［click圖放大］

 聲優選角FIT到爆，FANS一致覺得無論動畫化或者DRAMA CD化，都應該繼續沿用宣傳片嘅聲優。舉腳贊成！（我流廣東話。）

津田健次郎神還原《極主夫道》
喺第1期出版嘅時候，出版社用漫畫剪咗宣傳片，搵咗聲優津田健次郎為男主角「龍」配音。而之後期期都剪片，第2期條宣傳片加埋龍哥條阿雅（聲優：鈴村健一），第4期宣傳片係龍哥同佢好兄弟虎二郎（聲優：細谷佳正）一齊宣傳。

津田健次郎聲音沉厚，最易認得出佢有濃濃嘅鼻音，一口爛仔腔入型入格（正宗大阪人嚟㗎！）。由第1期宣傳片開始，把聲已經食到阿龍應一應，喺讀者心目中，一早就覺得「津田健次郎＝不死身之龍」。

原本FANS（包括我）都坐定粒六，等作品動畫化之後，繼續用番宣傳片嘅聲優班底，估唔到更加驚喜嘅係宣傳片會超進化，拍咗真人版，而且由津田健次郎本人飾演不死身之龍。有片為證，除咗把聲夠入格，津田健次郎係連造型同演技都完全還原不死身之龍，簡直係由漫畫走出嚟一樣！

睇埋Staff roll，津田健次郎仲有份做導演！

 津田健次郎自己都真心愛呢套作品，所以玩得好癲。

 神還原！

日本聲優個個都咁堅㗎咩？
係津田健次郎勁咋。
咁又唔好太誇張，係津田健次郎本人勁啫。雖然日本聲優把聲正、演技好、唱得、跳得、做電台節目主持、玩埋舞台劇嘅人非常多，但係神到好似津田健次郎咁嘅，又真係冇幾多個。

津田健次郎當然係以上咁多樣都有玩晒，同時都係舞台劇演員，拍過日劇、電影，演出經驗嚟講可能活躍過好多名不經傳演員或者偶像仔。我成日以為佢有份配過《人中之龍》系列，睇番資料，原來係冇（反而李燦森有配過），希望《人中之龍》製作組諗諗佢。

相信喺津田健次郎嘅演藝生涯，除咗《網球王子》嘅乾貞治為聲優迷熟悉，《極主夫道》嘅不死身之龍都算係代表作。

結論：
《極主夫道》快撚啲拍日劇啦！
而家咁多網台，唔駛玩咁大同電視台咁，少少哋玩網台已經有好大迴響。
唔好嘥咗咁好嘅作品同有愛嘅Back Up團隊。