雪晴老師，好好休息。

Rest in Heaven…

今日收到香港漫畫家雪晴老師已經離世嘅消息，個心沉咗一沉。


雪晴老師FACEBOOK嘅FRIEND POST

唔知大家有冇睇過雪晴老師嘅作品，我有由《YES！》開始睇《精靈少女魔法鼠》，但係從來唔係佢嘅忠實讀者（我都唔鍾意睇少女漫畫）。正式認識雪晴老師，係入咗天下，做《Comic Fans》開始。

喺《Comic Fans》同雪晴老師共事過一年多少少，其實我唔係佢嘅責任編輯（而係雪晴以外嘅漫畫家嘅責任編輯），所以比較少接觸佢，但係對雪晴老師個人嘅印象真係好深刻。

因為，雪晴老師真係好靚。

雪晴老師真係好靚。笑容好治癒。

係嘅，我好膚淺，靚女係特別好印象。而且佢嘅笑容真係好甜美，有時編輯部與漫畫家之間有小磨擦在所難免，但係望倒佢嘅笑容真係融晒，我會好自然企喺佢嗰邊而唔係企公司嗰邊（冇漫畫家哪有漫畫出版）。

雪晴老師明明係獅子座，但係從來未見過佢發脾氣，可能佢嘅獅子精神去晒工作上。

有時截稿日大家趕頭趕命，聽倒佢喺電話交待嘅嘢全部都好有條理，而且，佢唔止《Comic Fans》嘅連載（當時連載緊《超模糖》同埋《G.E.M.COMIC～完美攻略～》嘅漫畫，即係用宇宙G.E.M.做主角嘅原創作品，其實創作過程同同宇宙G.E.M.一啲關係都冇），仲有自己嘅原創作品。

當時聽講佢每日嘅平均睡眠時間係三四小時。日日係咁嘅話真係人都癲。
 個人覺得漫畫版G.E.M.係順眼過真人G.E.M.嘅。

另一樣佩服雪晴老師嘅地方，係佢喺好早開始，已經自組製作公司，以個人名義接JOB，而唔係依附某一間出版社。

當時唔係好似而家咁流行獨立出版，基本上都係靠出版社，令出版社覺得漫畫家冇咗自己唔得，唔簽死間出版社嘅話，漫畫家嘅待遇一般都唔係咁好。我非常支持漫畫家自己話事，唔駛聽晒間出版社啲廢意見（包括我講嗰啲意見都好廢），至少係贏係輸，都係向自己負責。

但係，其實一個漫畫家有本事嘅話，食幾家茶禮都冇問題。
雪晴老師就係有本事嘅漫畫家。

有本事，唔單止係講你有冇畫力、速度、創作力等等去準時交稿，同出版社維持良好關係，都係一種本事。我好少聽倒有出版社嘅人講雪晴老師壞話，甚至漫畫家之間，都好鍾意佢，呢啲咪就係本事囉。

仲有一點好好好好好很緊要，雪晴老師係個極度準時交稿嘅漫畫家。

可能你會話，「準時交稿是常識吧？」…。
（你望吓冨樫老師…）
但係好多漫畫家都冇意識準時交稿，遲咗入稿，美編唔會通頂幫你排版（《SpeedUP》會）、印廠唔會通頂幫你印雜誌，註定要遲出街，然後讀者會好唔開心，又會打電話上公司小爆編輯。係，少女漫畫嘅讀者都有激動嘅，我係有收過四字真言電話問題。

所以，雪晴老師無論喺嗰個月要畫幾多頁、要畫埋封面彩圖，都會準時交稿——最多遲半日。佢親口講過明白讀者嘅期待，亦都唔希望讀者每月買月刊嘅習慣會受影響。

雪晴老師北上後嘅作品。可惜電影本身麻麻，漫畫跟住套戲都係冇咩聲氣。

近幾年佢北上中國，我知道係難打嘅戰場。中國讀者冇香港讀者長期支持嘅基礎，亦都會用外國作品同香港作者比較，我喺其他漫畫家朋友口中聽到佢有幾努力。冇諗過喺呢個時候，雪晴老師會離開戰場。

雪晴老師唔需要再戰，希望你可以好好休息。

可能你未睇過雪晴老師嘅作品，又或者佢嘅作品唔係你杯茶（同我一樣），但係，佢擁有專業漫畫家嘅精神，絕對係所有同業嘅好榜樣。