《愛與誠》原稿400萬円拍賣事件

成件事以為睇緊武俠小說。

近日日本まんだらけ拍賣網站出現一宗高價漫畫原稿拍賣，拍賣品為國民級漫畫《愛與誠》彩色原稿，結果喺2018年5月6日以400萬円成交。

原本只係一宗正常不過嘅拍賣，你賣我買，邊個開高價，邊個買。

離奇在，原來呢張彩色原稿，係「失物」。

事源1974年，漫畫家永安巧大師借出一批原稿，包括《愛與誠》漫畫作品原稿，參加一次畫展，但係結果活動完結之後，竟然有15張稿唔見咗。呢批原稿一直喺江湖失蹤超過40年，直到2018年5月，其中一張畫咗女主角嘅彩稿喺まんだらけ拍賣網站，以拍賣品形式出現。

當年邊個偷畫？而家又係邊個拎張畫出嚟賣？
明明冇咗15張，而家畫賣一張，係咪代表仲有14張畫會陸續拎出嚟？

喺緝兇之前，講談社貴為《愛與誠》出版社，就喺5月10日發聲明，聲稱呢批原稿係從來都冇拎過出嚟賣，買咗嘅人都係買賊贓，仲呼籲有人知批原稿嘅去向，要盡快同講談社聯絡，話呢個都係永安巧老師嘅意思。



嘩，講到係賊贓咁嚴重喎！
於是所有人係咁插まんだらけ，話佢哋好俾啲賊贓上架任人BIT。

まんだらけ喺5月12日發聲明反擊，內容係咁嘅：

1. 既然出版社話呢張拍賣原稿係當年失物，我哋有問過出版社究竟係咪淨係唔見咗15張，同埋確認番呢張原稿係唔係當年唔見咗嗰批嘅其中一張，但係出版社冇覆我哋，咁唯有當呢張畫未必係同一批畫。

2. 我哋公司打開門做生意就好守法嘅，呢單嘢咁插落嚟我哋度，點諗都覺得怪囉。

3. 既然係出版社唔見咗啲原稿，責任當然喺出版社啦喂，咁講到尾法律嘅嘢我識條鐵，睇吓法律上邊個負責囉。

4. 睇完你哋講談社聲明，我哋就覺得呢，你鬧買家好買賊贓（好似係），做咩啫，都係你哋唔見咗原稿至搞成咁。覺得對唔住永安巧老師嘅話，你哋出版社咪做番出版社嘅責任，BIT番張原稿走，咁就對得住永安巧老師喇。唔好同我講「以前啲員工衰唔關我事」呢啲嘢囉。

講談社同まんだらけ各執一詞。まんだらけ仲要鬧番講談社管理有問題，同埋冇出版責任。SO FAR到現時為止，講談社係冇補充嘅。

無論如何，原稿就賣咗，最傷心嘅其實係漫畫家永安巧本人。
永安巧嘅太太永安福子喺漫畫網站《壬生義士伝》出咗一篇「永安巧老師的說話」，內容大致係，《愛與誠》係心血結晶，好似佢哋兩個一手湊大嘅細路咁，當年啲原稿唔見咗已經好唔開心，而知道400萬円賣咗出去，兩老心情都好沉重。尤其永安巧老師身體唔好，真係冇晒心機。

『壬生義士伝』永安 福子代筆發表「永安巧老師的說話」：
http://www.mibugishiden.com/comment.html




事件暫時告一段落，希望其他原稿可以番到原作者手上啦。

今次想講嘅係，「唔見咗原稿」呢件事，其實真係可大可小。

尤記得2008年，小學館唔見咗《魔界小金毛》５張原稿，被原作者雷句誠告上法廷，追討330百萬円損失，而小學館只肯賠50萬円。上咗3次法廷，結果係廷外和解，小學館埋單係俾咗225萬円謝罪金及和解金。而雷句誠與小學館正式解約，過檔去講談社，《魔界小金毛》重新喺講談社出版。

（當然，香港文化傳信版《魔界小金毛》因為當年係同小學館簽約，呢一刻自然要解除合約，連帶所有海外合約都要解除，所以海外版如果重出，都係講談社版本）

有時真係人夾人緣，如果好似雷句誠同小學館一樣，本身關係都已經麻麻，唔見咗原稿就會搞到法廷見。永安巧老師應該同講談社關係好好，大拿拿15張原稿，出版社唔見咗自己啲稿，仲可以同呢間出版社繼續合作。

其實大家都相信出版社未必有心整唔見啲原稿，尤其《愛與誠》批失稿消失江湖40年，一直都搵唔倒，出版社愧對老師，亦應該喺其他層面有對老師作出一啲補償。


但係，精明嘅香港人應該會覺得奇怪：
點解搞畫展之前唔買定保險？有咩事都算係有賠償，冇咁傷吖？

事實係咁嘅，莫講話1974年，就算係而家2018年，肯為漫畫嘅畫展受保嘅保險公司都唔多。

最大原因係，「無法估計漫畫原稿價值」。

當一本漫畫賣緊幾百円（或者卅幾蚊），咁一張原畫值幾多錢？任你講喎？而且，真係有人咁無聊去偷畫？

上面提到雷句誠事件，雷句誠提出一個POINT，「雖然我稿費好低，但係原稿係藝術」。講到藝術，就完全係另一個世界。

例如古董、名畫畫展或者拍賣，都有保險公司樂意受保，除咗知道批作品有市有價可以賣高價，仲知道主辦單位會做好保安，要賠嘅機會好細。

所以好多漫畫家／插畫家嘅畫展，都會用「複製原稿」取代原稿，以防有任何失竊。

但係漫畫係唔係藝術？
身為漫迷當然覺得「係」，即使用好平價錢可以買倒一期單行本，仍然係藝術。但係大眾社會喺幾十年嚟，仍然似乎未將漫畫提昇到藝術級水平。

任何漫畫家視自己作品如親生仔好正常，但係近十年嘅漫畫界，其實真係好流行「賣仔」。

漫畫家搞畫展（無論喺日本定海外），除咗會推出畫展限量精品、小畫冊、簽名板、直筆畫板，展示嘅原畫，往往會標明價錢，可以俾FANS買原畫走。咁樣做就方便保險公司開價，而賣到畫嘅錢，亦都係漫畫家另一個收入來源。

多產漫畫家唔怕賣咗自己嘅原稿，因為佢哋覺得可以再畫更加好嘅作品，自信嘅表現咪就係咁囉。

回想藝術界嘅畫家，都係靠賣畫維生，呢一點反而好藝術喎。

仲有另一種玩法。
除咗畫展，知名漫畫家仲可以搞FANS聚會，同FANS一齊舉行晚餐會兼分享講座，當然會去比較高級少少嘅餐廳，餐廳會提供同漫畫家作品有關嘅MENU，務求老師FANS都食得開開心心。

當然，首先你要係知名漫畫家。

（2017年淺田弘幸台北畫展。除咗限量小精品及畫冊，大部份展示原畫都有價錢，完美示範「賣仔莫摸頭」）

延伸閱讀：

有關雷句誠老師帶出的小學館問題〜其二
有關雷句誠老師帶出的小學館問題〜其三

今日金曲：

愛と誠～ALI PROJECT